ဗိုလ်တာရာ (ရဲဘော်သုံးကျိပ်)

ကိုယ်ရေးအကျဉ်း

ဗိုလ်တာရာ (ရဲဘော်သုံးကျိပ်) [ ၁၉၁၉-၁၉၉၃ ] ပျဉ်းမနားမြို့၌ အဖ သစ်ကုန်သည် နှင့် သစ်စက်ပိုင်ရှင် ဦးအကောက်၊ အမိ ဒေါ်လွမ်းတို့က ၁၃ ဧပြီ ၁၉၁၉ တွင် မွေးဖွားသည်။ မွေးချင်း ၆ ယောက်တွင် အငယ်ဆုံး ဖြစ်၍၊ အမည်ရင်းမှာ ဦးခင်မောင်ဦး ဖြစ် သည်။ ၁၉၃၈ တွင် ပျဉ်းမနားမြို့ ကေ၊ အီး၊ အမ် အထက်တန်း ကျောင်းမှ အင်္ဂလိပ်-မြန်မာ ၁ဝ တန်း အောင်သည်။ ၁၉၃၆ တွင် ပျဉ်းမနားမြို့ တို့ဗမာအစည်းအရုံးသို့ ဝင်ခဲ့ပြီး၊ ကျောင်းသား သမဂ္ဂ၊ ခရိုင်တို့ဗမာအစည်းအရုံး၊ ခရိုင် ဗမာ့လက်ရုံးတပ်ဖွဲ့၊ ခရိုင်တောင်သူလယ်သမားအစည်းအရုံးများ ဖွဲ့စည်းရာတွင် ရှေ့တန်းက ပါဝင်ခဲ့သည်။ ၁၉၃၇ တွင် မြန်မာနိုင်ငံလုံးဆိုင်ရာ တောင်သူလယ်သမား အစည်းအရုံး၏ စည်းရုံးရေးမှူး၊ ဘဏ္ဍာရေးမှူး တာဝန်များကို ထမ်းဆောင်ခဲ့သည်။ ၁၉၃၈ ကျောင်းသားသပိတ်ကြီးတွင် ပါဝင်ခဲ့သည်။ ၁၉၄၁ တွင် ရဲဘော်သုံးကျိပ်ဝင်အဖြစ် ဂျပန်နိုင်ငံ၌ စစ်ပညာသင်ခဲ့သည်။ ၁၉၄၂-၄၅ တွင် ဗမာ့လွတ်လပ်ရေး တပ်မတော်၊ ဗမာ့ကာကွယ်ရေး တပ်မတော်၊ မျိုးချစ်တပ်မတော်တို့တွင် ဗိုလ်မှူးအဆင့်အထိတာဝန်ထမ်းဆောင်ခဲ့သည်။ ဂျပန်နိုင်ငံမှအပြန် ထိုင်းနိုင်ငံတွင် ဗမာ့လွတ်လပ်ရေးတပ်မတော် ဖွဲ့စည်းစဉ် ‘သခင် ခင်မောင်ဦး”နာမည်မှ “ဗိုလ်တာရာ”နာမည် သို့ ပြောင်းခဲ့သည်။ ၁၉၄၅ တွင် ဗမာပြည် ကွန်မြူနစ်ပါတီဝင်၊ ၁၉၆ဝ တွင် ပြည်ထောင်စုပါတီ (ပထစ) ပျဉ်းမနား အမတ်အဖြစ် အရွေးခံခဲ့ရသည်။ ဒုတိယကမ္ဘာစစ် မတိုင်မီကပင် ဘားမားဂျာနယ်၊ ဒီးဒုတ်ဂျာနယ်၊ သူရိယ မဂ္ဂဇင်းများတွင် ဝတ္ထုတိုများ စတင် ရေးသားခဲ့သည်။ စစ်ပြီးခေတ်တွင် နိုင်ငံရေးမှ ထွက်ပြီး၊ စာပေရေးသားခြင်းဖြင့်သာ ရပ်တည်လာခဲ့သည်။ သွေးသောက်မဂ္ဂဇင်း (ဇူလိုင် ၁၉၅၀) ၌ ဖော်ပြသည့် “ကျွန်တော်နှင့် သူလျှို” ဝတ္ထုတိုတွင် `ဗိုလ်တာရာ (ရဲဘော်သုံးကျိပ်)'ကလောင်အမည်ကို စတင်အသုံးပြုသည်။ တော်လှန်ရေးဝတ္ထု၊ စစ်ဝတ္ထုများ ရေးသားခြင်းထက် အမဲလိုက်မုဆိုးဝတ္ထု အများအပြား ရေးသားခြင်းဖြင့် ထင်ရှားလာသည်။ ရဲဘော်သုံးကျိပ် ပြည်တော်ပြန် (၁၉၆၁) ဖြင့် ၁၉၆၁ ခုနှစ် စာပေဗိမာန်ဆု (သုတပဒေသာဆု) ကို ရွှေဥဒေါင်း၏ “တစ်သက်တာ မှတ်တမ်းနှင့် အတွေးအခေါ်များ” စာအုပ်နှင့် တွဲဖက် ရရှိသည်။ သိုင်းနယ်မှ ကျားသောင်းကျန်း”ဝတ္ထုတိုမှာ အထက်တန်း မြန်မာစကားပြေ လက်ရွေးစင်တွင် ပါဝင်ခဲ့သည်။ ‘မာန်စွယ်ဖွေးဖွေး”ဝတ္ထုကို ဟင်ဒီဘာသာသို့ ပြန်ဆိုခဲ့ကြသည်။ စုစုပေါင်း ဆောင်းပါး ၅၂ ပုဒ်၊ ဝတ္ထုတို ၂၅၆ ပုဒ်၊ ဝတ္ထုရှည် ၃ ပုဒ်နှင့် လုံးချင်း ၈၆ ပုဒ် ရေးသားခဲ့သည်။ နိုင်ငံတော်က ချီးမြှင့်သည့် နိုင်ငံ့ဂုဏ်ရည် (ပထမဆင့်) နှင့် လွတ်လပ်ရေး မော်ကွန်းဝင် (ပထမဆင့်) တို့ ရရှိခဲ့သည်။ ၆ ဖေဖော်ဝါရီ ၁၉၉၃ တွင် ရန်ကုန်မြို့ အရှေ့ရန်ကင်း နေအိမ်မှာ ကွယ်လွန်သည်။