မြသန်းတင့်

ကိုယ်ရေးအကျဉ်း

မြသန်းတင့် [ ၁၉၂၉-၁၉၉၈ ] ပခုက္ကူခရိုင် မြိုင်မြို့၌ အဖ ဦးပေါတင့်၊ အမိ ဒေါ်လှိုင်တို့က ၁၉၂၉ ခု မေ ၂၃ ရက် ကြာသပတေးနေ့တွင် မွေးဖွားသည်။ မွေးချင်း ခုနစ်ယောက်တွင် အကြီးဆုံးဖြစ်သည်။ အမည်ရင်းမှာ ဦးမြသန်းဖြစ်သည်။ မြိုင်မြို့ တိုင်းရင်းမြန်မာ အထက်တန်းကျောင်းနှင့် ပခုက္ကူမြို့ မြန်မာ- အင်္ဂလိပ် ဗုဒ္ဓဘာသာ အထက်တန်းကျောင်းတို့တွင် ပညာသင်ခဲ့သည်။ ပဉ္စမတန်း (၁၉၄၁)၊ဂျပန်ခေတ်တွင် ကျောင်းပြန်နေ(၁၉၄၂)၊ တက္ကသိုလ်ဝင်စာမေးပွဲ (၁၉၄၇)၊ ၁၉၄၈ ခု တွင် ရန်ကုန်တက္ကသိုလ်သို့ ရောက်သည်။ ဝိဇ္ဇာဘွဲ့(၁၉၅၄)၊ ဥပဒေဘွဲ့(၁၉၅၆)ရရှိခဲ့သည်။ အာရှလူငယ်အဖွဲ့ (၁၉၄၃)၊ ဖက်ဆစ်တော်လှန်ရေး မြေအောက်လှုပ်ရှားမှု (၁၉၄၄-၄၅)၊ မန္တ လေးခရိုင် အထက်မြန်မာပြည် ဖဆပလအဖွဲ့ချုပ်၊ မန္တလေးခရိုင် ကွန်မြူနစ်ပါတီနှင့် မြင်းခြံခရိုင် အလုပ်သမား သမဂ္ဂနှင့် လယ်သမား သမဂ္ဂတို့တွင် အလုပ်အမှုဆောင် (၁၉၄၅-၄၇)၊ ပခုက္ကူခရိုင် ကျောင်းသားများသမဂ္ဂ ဥက္ကဋ္ဌ(၁၉၄၇)၊ စာပေသစ်မဂ္ဂဇင်း ဦးဆောင်သူများတွင် တစ်ဦး(၁၉၅ဝ) ကမ္ဘာ့ငြိမ်းချမ်းရေး ကွန်ဂရက် [မြန်မာနိုင်ငံ] အလုပ်အမှုဆောင်၊ မြန်မာနိုင်ငံ စာရေးဆရာအသင်း အလုပ်အမှုဆောင်၊ စာရေးဆရာအသင်း၏“စာပေမဂ္ဂဇင်း' တာဝန်ခံ အယ်ဒီတာ၊ “ပြည်တော်သစ်ဂျာနယ်” အယ်ဒီတာချုပ်၊ “တိုးတက်ရေးသတင်းစာ” နိုင်ငံခြားရေး အယ်ဒီတာ(၁၉၅၂)၊ ပြည်တွင်း ငြိမ်းချမ်းရေး ဗဟိုကော်မတီ အတွင်းရေးမှူး (၁၉၅၅)၊ ကိုကိုးကျွန်းတွင် အထိန်းသိမ်းခံဘဝ (၁၉၅၈)၊ စာရေးဆရာကလပ် အမှု ဆောင် (၁၉၆ဝ)၊ စာရေးဆရာသမဂ္ဂ အမှု ဆောင် (၁၉၆၂)၊ ပြည်သူ့ တိုးတက်ရေး ပါတီ ပေါ်လစ်ဗျူရို အဖွဲ့ဝင်၊ ပြည်တွင်း ငြိမ်းချမ်းရေး အဖွဲ့ဝင်နှင့် ပြည်သူ့ကော်မတီ ဝင် (၁၉၆၃)နှင့် ဒုတိယအကြိမ်မြောက် အထိန်းသိမ်းခံ ဘဝဖြင့် ကိုကိုးကျွန်းတွင် (၁၉၆၃-၇၂)ထိ နေခဲ့။ ဝင်းဦး ကွယ်လွန်ပြီး နောက် “စန္ဒာ”မဂ္ဂဇင်းတွင် ခေတ္တလုပ်ကိုင် ခဲ့သည်။ ၁၉၆၁ တွင် ဆွီဒင်နိုင်ငံ၊ ဆိုဗီယက်ယူနီယံနှင့် တရုတ်ပြည်သူ့သမ္မတနိုင်ငံများသို့ သွားရောက်ခဲ့သည်။ ၁၉၄၉ ခု တာရာမဂ္ဂဇင်း အတွဲ(၃)၊ အမှတ် ၂၁ တွင် ပါရှိသည့် “ဒုက္ခသည်” သည် ပထမ ပုံနှိပ်ဝတ္ထုတိုဖြစ်သည်။ ကလောင်အမည်ခွဲ များစွာ သုံး၍ စာမျိုးစုံကို ပင်ကိုရေး၊ ဘာသာပြန်၊ အမှီး ပုံစံများဖြင့် စာအုပ်ပေါင်း ၁ဝဝ ခန့် ပြုစုခဲ့သည်။ ထင်ရှားသော စာအုပ်အချို့မှာ မေတ္တာအသင်္ချေ(၁၉၅၃)၊ လိုက်ခဲ့တော့မြနန္ဒာ (၁၉၆ဝ)၊ ဓားတောင်ကိုကျော်၍ မီးပင်လယ်ကိုဖြတ်မည်(၁၉၇၃)၊ ကျွန်တော် ဆက်၍ရေးချင်သော ဝတ္ထုများ(၁၉၇၄)၊ မှော်ရုံတောမှာ မောလှပြီ (၁၉၇၈)၊ ပါရီကျဆုံးခန်း (၁၉၈၂)၊ ရွှေပြည်တော် မျှော်တိုင်းဝေး(၁၉၈၆)၊ လေလွင့်သူ(၁၉၈၇)၊ ရေပွက်ပမာ(၁၉၈၉)၊ ခေတ်ပေါ်နိုင်ငံတကာ ကဗျာရှည်သုံးပုဒ်(၁၉၉၁)၊ နှစ်ဆယ်ရာစု နိုင်ငံရပ်ခြား ကဗျာများ (၁၉၉၃)၊ သမိုင်းထဲက မန္တလေး- မန္တလေးထဲက သမိုင်း(၁၉၉၇)၊ တောင်သမန်ရွှေအင်းက လေညင်းဆော်တော့(၁၉၉၉)တို့ ဖြစ်ကြသည်။ အမျိုးသားစာပေ ဘာသာပြန်ဆုရ စာအုပ်များမှာ စစ်နှင့် ငြိမ်းချမ်းရေး(၁၉၇၂)၊ လေရူးသုန်သုန်(၁၉၇၈)၊ ခန်းဆောင်နီအိပ်မက်(၁၉၈၈)၊ သုခမြို့တော်(၁၉၉၂)၊ အချစ်မိုးကောင်းကင်(၁၉၉၅) တို့ ဖြစ်ကြသည်။ မြသန်းတင့် ကလောင်အမည်အပြင် မြသန်း၊ မောင်သစ်တည်၊ စောယွမ်း၊ ထက်အောင်၊ မေမေလှိုင်၊ မင်းနန္ဒာ၊ ရဲအောင်ဇေ၊ အုတ်လှငယ်၊ ဇောတိက စသည် တို့ကိုလည်း အသုံးပြုသည်။ ၁၉၉၈ ခု ဖေဖော်ဝါရီ ၁၈ ရက် ည ၉း၁၅ နာရီတွင် ရန်ကုန် ပြည်သူ့ ဆေးရုံကြီး၌ ကွယ်လွန်ခဲ့သည်။