ဦးကျော်ငြိမ်း

ကိုယ်ရေးအကျဉ်း

ကျော်ငြိမ်း (မြန်မာသမိုင်းအဖွဲ့ဝင်) [၁၉၅ဝ-၂ဝ၂၂] မန္တလေးတိုင်းဒေသကြီး ရမည်းသင်းမြို့၌ အဖ ဦးထွန်းစိန်၊ အမိဒေါ်တင်ဥတို့က ၁၄ ဖေဖော်ဝါရီ ၁၉၅ဝ တွင် မွေးဖွားခဲ့သည်။ အမည်ရင်းမှာ ဦးကျော်ငြိမ်း ဖြစ်သည်။ ၁၉၅၆-၆၇ တွင် ပျဉ်းမနားမြို့ အမှတ် (၂) အစိုးရ အထက်တန်းကျောင်း၌ အခြေခံပညာဆည်းပူးခဲ့သည်။ ၁၉၆၇ တွင် တက္ကသိုလ်ဝင်တန်း အောင်မြင်ခဲ့သည်။ ၁၉၆၇-၆၉ တွင် မြစ်ကြီးနားကောလိပ် ဥပစာတန်း၌ သမိုင်းအဓိကဖြင့် ပညာသင်ယူခဲ့သည်။ ၁၉၆၉-၇၄ တွင် မန္တလေးတက္ကသိုလ်၌ ဆက်လက်၍ ပညာသင်ကြားခဲ့ပြီး၊ ၁၉၇၁ မှာ ဝိဇ္ဇာဘွဲ့၊ ၁၉၇၄ မှာ ပျဉ်းမနားသမိုင်း (၁၉၄၈-၆၂) ကို တင်သွင်း၍ မဟာဝိဇ္ဇာဘွဲ့ (ဂုဏ်ထူး) ရရှိခဲ့သည်။ ၂ဝဝ၂ တွင် အိန္ဒိယနိုင်ငံ ဟိုက်ဒြာဘတ် Central Institute of English and Foreign Languages (CIEFL) တွင်သင်တန်းတက်ရောက်ခဲ့သည်။ ၁၉၇၄-၈ဝ တွင် အခြေခံပညာအထက်တန်းနှင့် ပြင်ပဝိဇ္ဇာဘွဲ့ သမိုင်းဘာသာရပ်များကို သင်ကြားပို့ချခဲ့သည်။ ထို့နောက် အစိုးရ အမှုထမ်းအဖြစ် လားရှိုးကောလိပ် သမိုင်းဌာနတွင် နည်းပြနှင့်ဌာနမှူး (၁၉၈ဝ-၈၆)၊ ရန်ကုန်တက္ကသိုလ် သမိုင်းဌာန (သုတေသန) တွင် သုတေသနလက်ထောက်၊ တစ်ဖန် သုတေသနမှူး (၁၉၈၇-၉၂)၊ တက္ကသိုလ်များ သမိုင်းသုတေသနဌာနတွင် သုတေသနအရာရှိ (၁၉၉၂−၂ဝဝဝ)၊ တစ်ဖန် ယဉ်ကျေးမှုဝန်ကြီးဌာန သမိုင်း သုတေသန ဦးစီးဌာနတွင် ညွှန်ကြားရေးမှူးအဖြစ် တာဝန်ထမ်းဆောင်ခဲ့ပြီး ၂၀၁၀ ပြည့်နှစ်တွင် ယင်းရာထူးဖြင့်ပင် အငြိမ်းစားယူခဲ့သည်။ အငြိမ်းစားယူခဲ့ပြီးနောက် ၎င်းဌာနတွင်ပင် ‘ကျွမ်းကျင်သူ’ မှသည် မြန်မာသမိုင်းအဖွဲ့တွင် ‘အဖွဲ့ဝင်’အဖြစ် ကွယ်လွန်ချိန်ထိ ဆောင်ရွက်သွားခဲ့သည်။ ၁၉၇၉ တွင် ဒေါ်တင်တင်နုနှင့် လက်ထပ်ခဲ့သည်။ ၁၉၇၁ မကွေးခရိုင် စာမတတ်သူပပျောက်ရေးလုပ်ငန်း အ သုံးလုံးသင်တန်း လုပ်အားပေး၊ ၁၉၇၃ ပျဉ်းမနားမြို့နယ် သန်းခေါင်စာရင်း ကောက်ယူရေးလုပ်ငန်း လုပ်အားပေးများတွင် ပါဝင် ဆောင်ရွက်ခဲ့သည်။ ၁၉၇၃ ပြည်လုံးကျွတ် ဆန္ဒခံယူပွဲတွင် ပျဉ်းမနားမြို့နယ်၌ မဲရုံတာဝန် ထမ်းဆောင်ခဲ့သည်။ လားရှိုးကောလိပ် နှစ်လည်မဂ္ဂဇင်းတွင် ဆောင်းပါးများ ရေးသားခဲ့သည်။ အမှုထမ်းဘဝတွင် “မြန်မာ့နိုင်ငံရေးသမိုင်း (၁၉ဝ၆-၃ဝ)၊ (၁၉၄၅-၄၈)၊ (၁၉၄၈-၅၈)၊ (၁၉၅၈-၆၂)’ ‘မြန်မာ့နိုင်ငံရေး စနစ်ပြောင်းကာလ (၁၉၆၂-၇၄)”၊ “ရန်ကုန်တက္ကသိုလ်သမိုင်း (၁၉၂ဝ-၉၅)”၊ “ရန်ကုန်တက္ကသိုလ် ရက်စွဲသမိုင်း (၁၉၂ဝ-၉၅)” စာအုပ်များတွင် ပါဝင်ရေးသားခဲ့သည်။ ပြုစုခဲ့သော စာအုပ်များမှာ ရဲဘော်သုံးကျိပ် (၁၉၉၈)၊ ပုဂံမြတ်စွယ်တော်များသမိုင်း (၂ဝဝ၄)၊ လားရှိုးမြို့ မန်ဆူစေတီတော်သမိုင်း (၂ဝ၁၅)၊ ပင်လုံရုပ်ပုံလွှာ (၂ဝ၁၂) တို့ ဖြစ်ကြသည်။ “ကျော်ဇောအောင်”ကလောင် အမည်နှင့်လည်း စာနယ်ဇင်းများတွင် သမိုင်းဆိုင်ရာဆောင်းပါးများ ရေးသားခဲ့သည်။ “ဦးကျော်ငြိမ်း (အဖွဲ့ဝင်၊ မြန်မာသမိုင်းအဖွဲ့)”အမည်ဖြင့် ပြုစုခဲ့သော မြန်မာ့ရက်စဉ်သမိုင်း ဒုတိယတွဲ၊ အပိုင်း [၁] (၁၉၄၅-၄၈)၊ အပိုင်း [၂] (၁၉၄၈-၅၈)၊ အပိုင်း [၃] (၁၉၅၈-၆၂) တို့ကို သမိုင်းသုတေသနနှင့် အမျိုးသားစာကြည့်တိုက် ဦးစီးဌာနက ၂ဝ၂၁ တွင် ထုတ်ဝေခဲ့သည်။ နိုင်ငံတော်မှ ချီးမြှင့်သော နိုင်ငံတော်အေးချမ်းသာယာရေးတံဆိပ် (၃၁ သြဂုတ် ၁၉၈၉)၊ ငြိမ်ဝပ်ပိပြားရေးနှင့် တရားဥပဒေစိုးမိုးရေး တံဆိပ် (၃ အောက်တိုဘာ ၁၉၉၆)၊ ပြည်သူ့ဝန်ထမ်းတံဆိပ် (၄ ဇန်နဝါရီ ၂ဝဝ၄)၊ ပြည်သူ့ဝန်ထမ်းကောင်းတံဆိပ် (၄ ဇန်နဝါရီ ၂ဝဝ၆) တို့ ရရှိခဲ့သည်။ အသက် (၇၃) နှစ် အရွယ်၊ ၂၃ မေ ၂ဝ၂၂ တနင်္လာနေ့တွင် ကွယ်လွန်ခဲ့သည်