ကိုယ်ရေးအကျဉ်း
ပဲခူးတိုင်း၊ ညောင်လေးပင်မြို့နယ်၊ ပုစွန်မြောင်းရွာတွင် အဖ ဦးပု၊ အမိဒေါ်ခိုင်တို့က ၁၉၁၀ ခု ဇန်နဝါရီ ၁၉ ရက်တွင် မွေးဖွားခဲ့သည်။ အမည်ရင်းမှာမောင်လှဖြစ်သည်။ ပုစွန်မြောင်းရွာဆရာဦးဖေခိုင်ကျောင်းတွင် ၄ တန်းအထိ ပညာသင်ယူခဲ့သည်။ ၁၉၂၆ တွင် ညောင်လေးပင်မြို့ အာ၊ စီ၊ အမ် (ရိုမန်ကက်သလစ် သာသနာပြု) ကျောင်းမှ ၇ တန်းအောင်ခဲ့သည်။ ၁၉၃၀ ပြည့်နှစ်တွင် ရန်ကုန်အစိုးရအထက်တန်းကျောင်းမှ ၁၀ တန်း အောင်ခဲ့သည်။ ၁၉၃၁ တွင် ဘောလုံးသမားတစ်ဦးအဖြစ် မြူနီစပယ်တွင် ရာပြတ်အင်စပက်တော်၊ လူငယ်များကြီးပွားရေးအသင်း၏ စာကြည့်တိုက်မှူးနှင့် ညကျောင်းဆရာအဖြစ် လုပ်ကိုင်ခဲ့သည်။ ၁၉၃၂ တွင် "ကြီးပွားရေးလမ်းညွှန်မဂ္ဂဇင်း" ထုတ်ဝေသည့်အခါ စာ စရေးခဲ့သည်။ ၁၉၃၃ တွင် "ကြီးပွားရေးမဂ္ဂဇင်း" ကို ဦးစီးထုတ်ဝေခဲ့သည်။ ၁၉၄၀ တွင် "ကြီးပွားရေးမဂ္ဂဇင်း" ကို မန္တလေးသို့ ပြောင်းရွှေ့ထုတ်ဝေခဲ့သည်။ စစ်အတွင်း၌ မဂ္ဂဇင်းရပ်ဆိုင်းထားပြီး ကိုယ်ပိုင်စာအုပ်များ ရိုက်နှိပ်ထုတ်ဝေခဲ့သည်။ 'ကြီးပွားရေးမောင်လှ'၊ 'ကြီးပွားရေးအယ်ဒီတာမောင်လှ' ကလောင်အမည်များကိုအသုံးပြုခဲ့သည်။ လူထုဂျာနယ် ၁၅ ရက်တစ်ကြိမ်ထုတ်ကို ၁၉၄၅ တွင်လည်းကောင်း၊ လူထုသတင်းစာကို ၁၉ ဧပြီ ၁၉၄၆ တွင်လည်းကောင်း စတင်ထုတ်ဝေသောအခါ "လူထုဦးလှ" ကလောင်အမည်တွင်လာသည်။ ၁၉၅၁-၅၂ တွင် လူထုဂျာနယ်နှင့် သတင်းစာကိုပူးတွဲထုတ်ဝေခဲ့သည်။ ၁၉၆၇ ဇူလိုင် ၇ ရက်တွင် လူထုသတင်းစာကို ရပ်ဆိုင်းခဲ့ပြီး လုံးချင်းစာအုပ်များကိုသာ ဆက်တိုက်ရေးထုတ်ခဲ့သည်။ စာပေနှင့်လူထုလူတန်းစားအဖွဲ့အစည်းများတွင် ပါဝင်ခဲ့သည်။ ဂျပန်ခေတ် အာရှလူငယ်အသင်း ခရိုင်ဥက္ကဋ္ဌလုပ်သောကြောင့် ၁၉၄၅ တွင် ဗြိတိသျှနယ်ချဲ့၏ အဖမ်းဆီးခံရခြင်းအပါအဝင် ၅ ကြိမ်တိတိ ဖမ်းဆီးခံခဲ့ရသည်။ သတင်းစာနှင့် ငြိမ်းချမ်းရေးကိုယ်စားလှယ်အဖြစ် ၁၉၅၂ တွင် ဆိုဗီယက်၊ တရုတ်၊ အရှေ့ဂျာမဏီ၊ ၁၉၅၇ တွင် သီရိလင်္ကာ၊ ၁၉၆၀ တွင် အင်္ဂလန်၊ ပြင်သစ်နှင့် အနောက်ဂျာမဏီ၊ ဂျပန်၊ ၁၉၆၂ တွင် အင်ဒိုနီးရှားနိုင်ငံများသို့ သွားရောက်ခဲ့သည်။ ဆိုဗီယက်ရုရှား (၁၉၃၈)၊ ထိပ်ဆုံးသို့ (၁၉၄၀)၊ ရွှံ့နှင့်စစ်သား (၁၉၄၂)၊ ပန်းနှင့်စစ်သား (၁၉၄၂)၊ စသည့် ဘာသာပြန်စာအုပ်များ၊ လေနှင့်အတူ (၁၉၅၇)၊ ထောင်နှင့်လူသား (၁၉၅၇)၊ လှောင်ချိုင့်ထဲမှငှက်ငယ်များ (၁၉၅၈)၊ အားလုံးကောင်းကြရဲ့လား (၁၉၅၉)၊ စစ်၊ အချစ်နှင့် ထောင် (၁၉၆၀)၊ စစ်ပြိးစက ထောင်တံခါး (၁၉၆၈) စသည့်ထောင်အတွေ့အကြုံစာအုပ်များ၊ ၁၉၆၂ ခုနှစ်မှစ၍ထုတ်သည့် ကရင်ပုံပြင်များ(၁၉၆၂-၆၆)၊ ရခိုင်ကျေးလက်ပုံပြင်များ (၁၉၆၃-၆၈)၊ မွန်ပုံပြင်များ (၁၉၆၄-၆၈)၊ မြန်မာပုံပြင်များ (၁၉၆၅-၆၈)၊ လီဆူးပုံပြင်များ (၁၉၆၈)၊ ရဝမ်ပုံပြင်များ (၁၉၇၀)၊ လိုင်းနောင်နာဂပုံပြင်များ (၁၉၇၁) စသည့်တိုင်းရင်းသားပုံပြင်စာအုပ်များ၊ ဂျပန်ပြည်တစ်ခေါက် (၁၉၆၂)၊ အင်ဒိုနီးရှားအနောက်မှအရှေ့သို့(၁၉၆၃)၊ နာဂတောင်တန်းတစေ့တစောင်း (၁၉၆၇) ခရီးသွားစာအုပ်များ၊ သတင်းစာများသည် သမိုင်းကိုပြောနေကြသည်(၁၉၆၃)၊ သတင်းစာများပြောပြတဲ့စစ်တွင်းမြန်မာပြည် [လေးတွဲ](၁၉၆၈)၊ သတင်းစာများပြောပြတဲ့စစ်ပြီးစ မြန်မာပြည်[ပထမတွဲ](၁၉၆၉) စသည့် သမိုင်းနှင့် သတင်းစာမှတ်တမ်းစာအုပ်များ၊ ကျွန်တော်ဗြူရိုကရက်(၁၉၇၀)၊ ကျွန်တော် ဗြူရိုကရက်(၁၉၇၀)၊ ကျွန်တော်စတီးပွဲစား (၁၉၇၀)၊ ကျွန်တော်မြင်းသမား (၁၉၇၂)၊ စသည့် "ကျွန်တော်....." စာအုပ်များမှာ ထင်ရှားသည်။ 'ထောင်နှင့်လူသား' ဖြင့် ၁၉၅၇ ခုနှစ် စာပေဗိမာန်ပဒေသာဆု၊ 'လှောင်ချိုင့်တွင်းမှငှက်ငယ်များ'ဖြင့် ၁၉၅၈ ခုနှစ် ယူနက်စကို စီးပွားရေး လူမှုရေးဆိုင်ရာဆု၊ 'ရခိုင်ကျေးလက်ပုံပြင်များဖြင့် ၁၉၆၃ ခုနှစ် စာပေဗိမာန်အနုပညာစာပေဆုတွင် ကလေးသူငယ်ဆိုင်ရာ စာပေ ဒုတိယဆုများ ရရှိခဲ့သည်။ ၁၉၈၂ ခု ဩဂုတ်လ ၇ ရက်နေ့တွင် မန္တလေးမြို့ ၌ ကွယ်လွန်သည်။