လက်တွေ့အသုံးချ ဆေးနည်းတို (ဆေးမြီးတို) များ အမေးအဖြေ (ပထမတွဲ)

အကျဉ်းချုပ်

ဆရာ ကြည်လွင်မြင့် (မုဒြာ)ကို မန္တလေး လာတဲ့ တိုင်းရင်းဆေး လေ့လာသူ ထိုင်း၊ တရုတ် စသည့် ဧည့်သည်များ ဆက်စပ်ပေးခဲ့ဖူးတယ်။ ဒါကို အကြောင်းပြုပြီး ဆရာကိုယ်တိုင် အိမ်နီးချင်းနိုင်ငံများကို ခြေဆန့်ပြီး ပညာဖြန့်တာ၊ နှီးနှောတာ လုပ်နေတာ တွေ့တော့ ဝမ်းသာရပါတယ်။ နောက်ပြီး “လူအကြောင်း ပေါင်းမှသိ” ဆိုသလို မန္တလေးကနေ နေပြည်တော်ကို အစည်းအဝေး သွားတဲ့အခါ ဆရာနဲ့ ဟိုတယ်မှာ မကြာခဏ အတူတူ တည်းဖြစ်ကြတယ်။ ဆရာကိုယ်တိုင် ကျင့်ကြံနေထိုင် ပုံတွေ၊ ကျန်းမာရေး လိုက်စားပုံတွေကို သတိပြုမိတယ်။ ဆရာဟာ သူ့စာပါ အတိုင်း ကျင့်ကြံ နေထိုင်တာကို တွေ့ရတယ်။ ယခုအခါ ကြေးမုံသတင်းစာမှာ လက်တွေ့အသုံးချ ဆေးနည်းတို (ဆေးမြီးတို)များ အမေး၊ အဖြေ ရေးနေတော့ လေးစားတယ်၊ အားကျတယ်၊ ဂုဏ်ယူတယ်။ ယခု ဆောင်းပါးတွေ စုပြီး ထုတ်တော့မယ်။ စောင့်ဖတ်နေ တဲ့ ပရိသတ် အခိုင်အမာ ရှိနေတော့ ပိုအောင်မြင်မယ်လို့ ယုံကြည်ပါတယ်။ ဆရာ ကြည်လွင်မြင့် (မုဒြာ) အသက်ရှည် ကျန်းမာ စိတ်ချမ်းသာ စွာ တိုင်းရင်းဆေးပညာဖြင့် အများပြည်သူအကျိုး ပိုမိုသယ်ပိုး တိုးနိုင်ပါ စေလို့ ဆန္ဒပြုလိုက်ရပါတယ်။ ကျော်သိန်းဌေး (ခေတ္တ)ညွှန်ကြားရေးမှူးချုပ်၊ တိုင်းရင်းဆေးပညာဦးစီးဌာန၊ နေပြည်တော်။