လက်ရွေးစင် စာတမ်းများ

အကျဉ်းချုပ်

ထိုကျမ်းကို ဖန်ချော့ ပြုစုရေးသားရခြင်း အဓိကအကြောင်းရင်းသည် ထန်မင်းဆက် တရုတ်နိုင်ငံအား အနှောင့်အယှက်ပေးခဲ့သော၊ ဆက်၍ ခြိမ်းခြောက်မှုလည်း ရှိမည်ဖြစ်သော နန်စော အကြောင်းစုံကို ဗဟိုအစိုးရ အရာရှိများအား သိရှိထားရန် ဖြစ်၏။ မိမိသိခဲ့သော အကြောင်းအရာများအပြင်၊ ပုဂ္ဂလိက မှတ်တမ်းမှတ်ရာ များစွာကို ဖတ်ရှူလေ့လာခဲ့ကြောင်း၊ နန်စော၏ နယ်မြေဖြစ်သော ယူနန်နယ်သို့ ဝင်ထွက်လေ့ရှိသော ကုန်သည် အစရှိသော ပုဂ္ဂိုလ်များနှင့် ယူနန်နယ်အကြောင်းကို သိကျွမ်းသူများထံမှ မေးမြန်းစုံစမ်းခဲ့ကြောင်း၊ ၎င်း၏ကျမ်းကို လေ့လာလျှင် ထင်လင်းစွာ သိမြင်နိုင်၏။ ဗန်ချော့၏ မှတ်တမ်းသည် ရာနှုန်းပြည့် စုံလင်သည်။ ချွင်းချက်မရှိ မှန်ကန်သည်ဟု မဆိုနိုင်သော်လည်း၊ စုဆောင်း ထားသော အချက်အလက်များသည် သမိုင်းတန်ဖိုး အလွန်ကြီးမားကြောင်း လေ့လာတွေ့ရှိသည်။ ဤသို့ ယူနန်နယ်အတွင်း အခြေအနေကို မေးမြန်းစုံစမ်းယင်း ယူနန်နယ်နှင့် နယ်မြေဆက်စပ်သော ပျူနိုင်ငံ အကြောင်းလည်း ပါလာသည်။ ပျူတို့အကြောင်းကို ဖေါ်ပြသော သီးသန့်အပိုင်းတစ်ပိုင်း ရှိသော်လည်း၊ ယူနန်နယ် အတွင်းအကြောင်း၊ အထူးသဖြင့် နယ်စပ်အကြောင်းကို ဖေါ်ပြထားပါသည်။