ဝိပဿနာအနှစ်ချုပ်စက်ဝိုင်း

အကျဉ်းချုပ်

မြတ်ဗုဒ္ဓ၏ လမ်းစဉ်ကိုအကျဉ်းချုံး၍ ရုပ်လုံးကြွအောင် စာရေးသူက ပုံဖော်ထားသည့် Logo စက်ဝိုင်းတစ်ခုသာ ဖြစ်ပါသည်။ ပုံနှိပ် ထုတ်ဝေခဲ့ပြီးသော ဝိပဿနာစာအုပ်အသီးသီးတို့၌ လွန်ခဲ့သော အနှစ် ၂ဝ ကစ၍ အစဉ်တစိုက် အသုံးပြုလာခဲ့သည့်အပြင် အမှတ်တံဆိပ် ရင်ထိုးအဖြစ်လည်း ယောဂီများကိုယ်၌ တပ်ဆင်ပေးထားခဲ့ပြီးဖြစ်၍ ယောဂီများ အကျွမ်းတဝင်ရင်းနှီး ပြီးသား Logo စက်ဝိုင်းလေးသာ ဖြစ်ပါသည်။ ရှေ့ပိုင်းကထုတ်ဝေခဲ့ပြီးသော ဝိပဿနာစာအုပ်အသီးသီးတို့တွင် ယင်း Logo စက်ဝိုင်းအတွက်- (၁) ““အနက်အဓိပ္ပာယ်ဖွင့်ဆိုချက်”” ဖြင့် တစ်မျိုး၊ (၂) “ဝိပဿနာလုပ်ငန်းစဉ်ဇယား”ဖြင့်တစ်ဖုံ၊ (၃) ““ရှုမှတ်ပွားများဖို့ရာ လယ်တီဝိပဿနာ””လမ်းညွှန်မှုစာစုတို့ဖြင့်တစ်နည်း၊ ထိုသို့ နည်းလမ်းအသွယ်သွယ်ကြံဆ၍ Logo စက်ဝိုင်း၏ အတွင်းသရုပ် မှန်ကို နှစ်အတန်ကြာကပင် ထုတ်ဖော်ပြသသိစေအပ်ခဲ့ပြီးလည်း ဖြစ်ပါသည်။ သို့ပါသော်လည်း ယောဂီတို့အတွက် ဤမျှလောက်နှင့် ပြည့်စုံလုံလောက်သော ထိရောက်မှု မရှိနိုင်သေးတာကြောင့် ပကတိအခြေအနေနှင့် လိုအပ်ချက်များ၏ တောင်းဆိုမှုအရပင် ဤ ““ဝိပဿနာ အနှစ်ချုပ်စက်ဝိုင်း”” ဖွင့်ဆိုချက်အမှန်အကန် ထပ်မံပေါ်ထွက်လာ ခဲ့ရခြင်းဖြစ်သည်ဟု ဆိုရပါမည်။