မြန်မာစကားပြေ လမ်းညွန်

အကျဉ်းချုပ်

ဤသုံးသပ်လမ်းညွန်ချက်များတွင်ကား ရေးသူ တွေ့မြင် အကဲခတ်နိုင်စွမ်းသမျှသော ရသတို့ကို တင်ပြဆွေးနွေးလမ်းညွှန်ခြင်း သဘောသာဖြစ်၍ ကျန်စာပေတစ်ရပ်လုံးကို ဖတ်ရှုလေသမျှသော စာပေမွေ့လျော်သူတို့သည် ဤကျဉ်းမြောင်းလှစွာသော ပုံစံ၊ ဥဒါဟရုဏ်၊ နမူနာတို့ကိုအကြောင်းပြု၍ နိုးကြားကျယ်ပြန့်သော အမြင်၊ ပိုမိုတက်ကြွ ထက်သန်သော ဇောဆန္ဒတို့ဖြင့် အခြားအခြား ကြွင်းလပ် သမျှ၊ ထွက်ပေါ်ပြီးနှင့် ထွက်ပေါ်လာလတ္တံဖြစ်သော စာပေလက်ရာများကိုပါ အရသာခံ၍ သုံးသပ်လေ့လာကြစေလိုပေသည်။ စာပေဟူသည်မှာ ရေးရင်း ပုဂ္ဂိုလ်၏ဆန္ဒ တစ်စုံတစ်ရာ ထင်ဟပ် ရာ ကြေးမုံပြင်ပင်ဖြစ်သောကြောင့် ပုဂ္ဂိုလ်မရွေး၊ အရေးအသားမရွေး အရသာတစ်မျိုးမဟုတ် တစ်မျိုး ရှိသည်သာဖြစ်၍ ယူတတ်ကြရမည်။ ခံစားနိုင်မည်သာ ဖြစ်ပေသည်။ ထိုနည်းအတူ အကောင်းအညံ့သည်လည်း ရှိတတ်သည်သာ ဖြစ်၍ လေ့လာသူက မိမိ၏အသိအမြင်နှင့် ဆန္ဒအားလျော်စွာ ဆုံးဖြတ်ခံယူနိုင်မည်သာ ဖြစ်ပေသည်။