ခေတ်မီ ဧတဒဂ်ဝတ္ထုတော်ကြီး

အကျဉ်းချုပ်

ဤကျမ်းကြီးကို ပိဋကဗျူဟာအဖွဲ့အနေဖြင့် ပြန်လည်ရိုက်နှိပ်ပူဇော်ရန် ဆန္ဒများဖြစ်ပေါ်လာပါသဖြင့် ရိုက်နှိပ်ခွင့်ရရှိရန် မူလ စာမူပိုင်ရှင်ဖြစ်သော သစ္စာမဏ္ဍိုင် ပိဋကတ်စာပေမှ ဦးညွန့်ဝေ၊ ဇနီး ဒေါ်မြကြည်၊ သမီး မနိုင်နိုင်ဝင်းတို့အားဆက်သွယ်၍ ရိုက်နှိပ်ခွင့် တောင်းခံခဲ့ရာ ဦးညွန့်ဝေ၏ ကျန်းမာရေးအခြေအနေကြောင့် ခေတ္တမျှဆိုင်းငံ့နေရပြီး၊ ယခုအခါမှ ပြန်လည် ရိုက်နှိပ်ခွင့်ရရှိပါသဖြင့် ပိဋကဗျူဟာအဖွဲ့၏ (၂၃)အုပ်မြောက်ကျမ်းစာအဖြစ် ရိုက်နှိပ်ရန် စီစဉ်ဆောင်ရွက်ခဲ့ရပါသည်။ ဤသို့ထုတ်ဝေခွင့်ရရှိခဲ့သဖြင့်သစ္စာမဏ္ဍိုင်စာပေမှ ဦးညွန့်ဝေ+ဒေါ်မြကြည် သမီး မနိုင်နိုင်ဝင်းတို့အားလည်းကောင်း၊ ကျမ်းစာအုပ်ကို ရှာဖွေ၍ အစည်းအဝေး တင်ပြခဲ့သောအမှုဆောင်လူကြီး ဦးငွေအောင်မွန်(ဓမ္မာစရိယ B.A)ကိုလည်းကောင်း၊ ပဲခူးမြို့ သာသနာ့မဏ္ဍိုင်စာသင်တိုက်ကိုလည်းကောင်း၊ အဖွဲ့ကိုယ်စား အထူးကျေးဇူးဥပကာရတင်ရှိပါကြောင်း ဖော်ပြအပ်ပါသည်။ သာသနာတော်အတွက် ဤကျမ်းစာအုပ်ကိုပြန်လည်ရိုက်နှိပ်ပူဇော်ရခြင်း အားဖြင့် ပုဂ္ဂိုလ်ထူး၊ ပုဂ္ဂိုလ်မြတ်များ၏ ကျင့်ကြံမှုများကို အားကျအတုယူပြီး နောင်လာပုဂ္ဂိုလ်များက အတုယူဆောင်ရွက်နိုင်စေခြင်းအကျိုးငှာ လွန်စွာအကျိုး ကျေးဇူးများမည်။