စကားပုံပေါင်းချုပ်

မြတ်စွာဘုရား ဟောကြားတော်မူသော နည်းလမ်းကို မှီငြမ်း နိဿယပြု၍ နောက်နောက်သော အဋ္ဌကထာဆရာ, ဋီကာဆရာ, ကျမ်းပြုဆရာ အသီးသီးတို့သည် မိမိတို့ရေးသားသော အဘိဓမ္မာ, သုတ္တန်, ဝိနည်း, အဋ္ဌကထာ, ဋီကာ စသောကျမ် တို့၌ ထိုက်သည် အားလျော်စွာ ဥပမာစကားများကို ရေးသား ထည့်သွင်း၍ ပြဆိုတော်မူကြသည်။ မြတ်စွာဘုရားနှင့်တကွ အဋ္ဌကထာဆရာ, ဋီကာဆရာတို့၏ နည်းကို အတုလိုက်၍ နောက်နောက်သော သင်္ဂဇာဆရာတော် ဆရာတော်ကြီးစသော ဆရာတော်ကြီး အသီးသီးတို့သည်လည်း ဥပမာစကားကို မိန့်ကြား သုံးစွဲတော်မူကြကုန်သည်။ ထိုဆရာတော်ဘုရားကြီးများနည်းသို့ အတု လိုက်၍ ယခုနောက်နောက်သော အမျိုးသားတို့သည် ဥပမာကို သုံးစွဲပြောဆိုကြခြင်း ဖြစ်သည်။ ဤသို့ ရှေးရှေးသော ဘုရားစသော သူတော်ကောင်းတို့၏ နည်းကောင်း ထုံးစံဖြစ်သောကြောင့် ဥပမာစကားများကို လေးစားမပြု ဂရုမစိုက်ဟူ၍ မထီမဲ့မြင် ပြုခြင်းမှ ရှောင်ရှားကြပါကုန်။