မန္တလေး၊ မဟာမုနိကျောက်စာစု (နိုင်ငံတော် မြေယာစီမံခန့်ခွဲမှု ပြန်လည်စိစစ်ရေး စီမံကိန်းဆိုင်ရာ မှတ်တမ်းများ လေ့လာချက်)

အကျဉ်းချုပ်

မဟာမုနိကျောက်စာစု ဟူသည် ၁၇၈၅ ခုနှစ် မှ ၁၇၉၃ ခုနှစ်အထိကာလအတွင်း အုံမင်း(၁၇၈၂-၁၈၁၉) က နိုင်ငံတော်အတွင်းရှိ ကျောင်းဘုရား ဝတ်မိုးဝတ်မြေများအဖြစ် လှူဒါန်းထားရှိခဲ့မှုများကို ကျမ်းဂန်နှင့် ညီ မညီ၊ တရားဝင်မှု ရှိ မရှိ ပြန်လည်စိစစ်ခဲ့သည့် မှတ်တမ်းကျောက်စာများ ဖြစ်ပါသည်။ ထိုကျောက်စာများ ဖြစ်ပေါ်လာရန်အတွက် ဗဒုံမင်းသည် မောင်းထောင်သာသနာပိုင် အရှင်ဉာဏ၏ အကူအညီများစွာ ရယူခဲ့ပါသည်။ သာသနာပိုင်၏ အကြံပြုချက်၊ တိုက်တွန်းချက်၊ ကျမ်းဂန်အကိုးအကား အထောက်အထားတို့သည် အသစ်ကျောက်စာ ရေးထိုးနိုင်ရေးအတွက် များစွာ အထောက်အကူပြုခဲ့ ပါသည်။ မူရင်းကျောက်စာ သယ်ယူစုဆောင်းရေးလုပ်ငန်း၊ မော်ကွန်း၊ သမိုင်းလက်စွဲစာ၊ စစ်တမ်း စစ်ချက်များ စုဆောင်းရေးလုပ်ငန်းနှင့်အတူ အသစ်ကျောက်စာရေးထိုးနိုင်ရန် ပေ၊ ပုရပိုက်များဖြင့် ရေးကူးရခြင်းလုပ်ငန်းများ ဆောင်ရွက်လာရပါသည်။ တစ်ဘက်ကလည်း အသစ်ကျောက်စာ ရေးထိုးနိုင်ရန် ကျောက်တုံး၊ ကျောက်ပြားများ သယ်ယူစုဆောင်းရခြင်း၊ ကျောက်စာရေးထိုးနိုင်ရန် ပြင်ဆင်ရခြင်းနှင့် ရေးထိုးရခြင်းအလုပ်များ မနေပနား ဆောင်ရွက်နေကြရပေမည်။