ဗုဒ္ဓစာပန်းချီ (ဒုတိယတွဲ)

ဗုဒ္ဓစာပန်းချီကို စာရေးသူ ဆရာငွေဥဒေါင်း ကိုယ်တိုင်က “ဘုရားရှင်နှင့် ဘုရားရှင်၏ တပည့်သား သံဃာတော် များ၏ အကြောင်းရပ်မျိုးစုံကို နှစ်သက်ဖွယ်ဖြစ်အောင် စွမ်းနိုင်သရွေ့ စာပန်းချီ ရေးဖွဲ့ထားသည်" ဟု ဖွင့်ဆိုခဲ့ပါသည်။ ဆရာဖွင့်ဆိုထားသည့်အတိုင်းပင် ဗုဒ္ဓစာပန်းချီ (၆-တွဲ) သည် ဘုရားရှင်၏ ဖြစ်တော်စဉ် ဗုဒ္ဓဝင်ကိုလွန်၍ တပည့် ရဟန်းသံဃာများ၏ ဖြစ်စဉ်ကိုပါ ကျယ်ကျယ်ပြန့်ပြန့် ရေးဖွဲ့ထားရာ စာဖတ်သူများ အထူးနှစ်သက်၍ အကြိမ်ကြိမ် ထပ်မံပုံနှိပ်ရသည့် စာအုပ်ဖြစ်သည်။

“ဗုဒ္ဓစာပန်းချီ” သည် စာဖတ်သူများ အထူးနှစ်သက်ခံရသည်သာမက စာရေးဆရာ ငွေဥဒေါင်း (၁၉၁၅-၉၇) ၏ အကောင်းဆုံး စာပေလက်ရာဟုလည်း သတ်မှတ်ခံရသည်။ စာပန်းချီဟူသော အသုံးကပင် တစ်မူထူးလှပါ၏။ စာအကြောင်းအရာနှင့် လိုက်ဖက်လှသည့် အသုံးဟုပင် ဆိုချင်ပါ၏။ ဗုဒ္ဓစာပန်းချီကို စာပေအမျိုးအစားအားဖြင့် ဝတ္ထုဟု မဆိုနိုင်သော်လည်း အကြောင်းအရာ (ဇာတ်လမ်း) ကို ရသပါပါ ဝတ္ထုဟန် ရေးဖွဲ့ထားသည့် စာဖြစ်သည်။ စာပေအမျိုးအစားအားဖြင့် စာပဒေသာဟု ဆိုနိုင်ပါသည်။