ကမ္ဘာပေါ်မှာအပျော်ဆုံးလူ THE HAPPIEST MAN ON EARTH

ဂျူးလူမျိုး ‘အယ်ဒီဂျေကူ' (Eddie Jaku) ဟာ ၁၉၂၀ ခုနှစ်က ဂျာမနီနိုင်ငံမှာ မွေးဖွားခဲ့တယ်။ ငယ်စဉ်ကတည်းက သူ့ကိုယ်သူ ဂျာမန် လူမျိုးက ပထမ၊ ဂျူးလူမျိုးက ဒုတိယလို့ ခံယူထားခဲ့တယ်။ ဂျာမနီနိုင်ငံကို လည်း သူ့မိခင်နိုင်ငံအဖြစ် ဂုဏ်ယူနေခဲ့တယ်။ သူ့ရဲ့ကလေးဘဝဟာ ပျော်စရာ ကောင်းနေခဲ့တယ်။ ဒါပေမဲ့ သူ့အသက် ၁၈ နှစ်အရွယ် ၁၉၃၈ ခုနှစ်၊ နိုဝင်ဘာလ ရောက်တော့ သူ့ဘဝ ရုတ်တရက် ပြောင်းလဲသွားတယ်။ သူဟာ နာဇီစစ်သား တွေရဲ့ရိုက်နှက်ဖမ်းဆီးခြင်းခံရပြီး အလွန် ရက်စက်ကြမ်းကြုတ်တဲ့ နာဇီအကျဉ်း စခန်းကို အပို့ခံရတယ်။

သူဟာ ၇ နှစ်ကြာအောင် မစဉ်းစားဝံ့စရာ ထိတ်လန့်ကြောက်မက်ဖွယ် အဖြစ်ဆိုးတွေနဲ့ ကြုံတွေ့ခဲ့ရတယ်။ ပထမတော့ နာဇီစစ်သားတွေရဲ့ဖမ်းဆီးခြင်း ခံရတယ်။ ဘူခင်ဝါးအကျဉ်းစခန်းနဲ့ နောက်တော့ အော့စ်ဝစ်ချ်အကျဉ်းစခန်း ကို အပို့ခံရတယ်။ နေ့ရောညပါ နှင်းတောထဲမှာ လမ်းလျှောက်ရလို့ အကျဉ်းသား တစ်သောင်းခွဲလောက် သေဆုံးခဲ့တဲ့ သေမင်းတမန်ချီတက်ပွဲမှာ ပါဝင်ခဲ့ရတယ်။ နောက်ဆုံးတော့ အယ်ဒီဟာ နာဇီအကျဉ်းစခန်းက ထွက်ပြေးရင်း အမေရိကန် စစ်တပ်ရဲ့ ကယ်တင်ခြင်းခံရတယ်။အကျဉ်းစခန်းက လွတ်မြောက်ပြီးတော့ ဘယ်လ်ဂျီယံနိုင်ငံမှာ အလုပ် လုပ်တယ်။ ၁၉၅၀ ခုနှစ်မှာ မိသားစုနဲ့အတူ ဩစတေးလျနိုင်ငံကို ပြောင်းရွှေ့ သွားပြီး အဲဒီမှာ အလုပ်လုပ်တယ်။ ၁၉၇၂ ခုနှစ်ကစပြီး ဩစတေးလျနိုင်ငံ ဆစ်ဒနီမြို့မှာ သူ့ရဲ့ နာဇီအကျဉ်းစခန်း ကြုံတွေ့ခဲ့ရတဲ့ အဖြစ်အပျက်တွေကို ဟောပြောပေးရင်း အကျဉ်းစခန်းမှာ အသက်ဆုံးရှုံးခဲ့ကြတဲ့ ဂျူးအကျဉ်းသား တွေကို ဂုဏ်ပြုနေခဲ့တယ်။ အလွန်တရာဆိုးဝါးတဲ့ အဖြစ်ဆိုးတွေနဲ့ ကြုံတွေ့ခဲ့ ရပေမယ့်လည်း အယ်ဒီဟာ သူ့ကိုယ်သူ ကမ္ဘာပေါ်မှာ အပျော်ဆုံးလူလို့ ခံယူ ထားတယ်။

အယ်ဒီနဲ့ သူ့ဇနီး ‘ဖလိုး” ဟာ ၇၅ နှစ်ကြာ လက်ထပ်ပေါင်းသင်းခဲ့ကြပြီး သားနှစ်ယောက်နဲ့ မြေးမြစ်တွေ အများကြီးရခဲ့တယ်။ သူဟာ ၂၀၂၁ ခုနှစ် အောက်တိုဘာလ အသက် ၁၀၁ နှစ်မှာ ကွယ်လွန်သွားခဲ့တယ်။

ဒီစာအုပ်ကို နိုင်ငံအတော်များများမှာ ဘာသာပေါင်း ၃၇ ဘာသာ ပြန်ဆို ပြီးခဲ့လို့ အယ်ဒီပေးချင်တဲ့ အမုန်းတရားမပြန့်ပွားရေး message သတင်းစကား ဟာ ကမ္ဘာအနှံ့ ပျံ့နှံ့နေပါတယ်။