စကားပြေ အရေးအသား ကကြီး ခခွေး

အကျဉ်းချုပ်

ရည်မှန်းပရိသတ် “စကားပြေအရေးအသား ကကြီး ခခွေး” လေ့ကျင့်စာကို အခြေခံပညာ၊ အဆင့်မြင့်တန်းနဲ့ တက္ကသိုလ် ပထမနှစ် ကျောင်းသူကျောင်းသားတွေအတွက် ရည်ရွယ်ပြီး ရေးပါတယ်။ စကားပြေ အရေးအသား ဝါသနာပါလို့ နိုင်ငံရပ်ခြားစံနှုန်းအတိုင်း ရေးချင်တဲ့ စာရေးစပြုသူတွေအတွက်လဲ အကျိုးရှိနိုင်ရာပါတယ်။ ရည်မှန်းချက် “စကားပြေအရေးအသား ကကြီး ခခွေး” လေ့ကျင့်စာကို ဖတ်မှတ်လေ့ကျင့်ပြီးတဲ့အခါ- ၁။ ကိုယ် ဖတ်ရတဲ့ စာတွေမှာ အဆိုတွေ၊ အထောက်အပင့်တွေ၊ သာဓကတွေနဲ့ စနစ်တကျ စည်းစည်းရုံးရုံး ရေးထား မထား စိစစ်ပြတတ်တဲ့၊ ၂။ ကိုယ်တိုင် ရေးတဲ့အခါ အဆိုတွေ၊ အထောက်အပင့်တွေ၊ သာဓကတွေနဲ့ စနစ်တကျ စည်းစည်းရုံးရုံး ရေးတတ်တဲ့ အရည်အသွေး နှစ်ရပ် တိုးပွားလာဖို့ ရည်မှန်းပါတယ်။ ပါဝင်မဲ့အပိုင်း လေ့ကျင့်စာမှာ အပိုင်း လေးပိုင်း ပါမယ်။ ၁။ အရေးအသားအခြေခံ၊ ၂။ စာပိုဒ်ဖွဲ့ပုံ၊ ၃။ စာပုဒ်ဖွဲ့ပုံ၊ ၄။ ဖတ်စရာအထွေထွေ။