နံရံ၏ အခြားတစ်ဖက်

ဂျူး၏ "နံရံ၏အခြားတစ်ဘက်" ဝတ္ထုသည် လူငယ်အမျိုးသမီးတစ်ဦးဖြစ်သူ နှောင်းခိုင်ဇော်၏ ဘဝဖြတ်သန်းမှု၊ အချစ်နှင့် ကျန်းမာရေးဆိုင်ရာ အလှည့်အပြောင်းများကို စိတ်လှုပ်ရှားဖွယ် ရေးဖွဲ့ထားသော လက်ရာတစ်ခုဖြစ်သည်။ ဇာတ်လမ်းအစတွင် သင်္ဘောပေါ်၌ ဆုံတွေ့ခဲ့ရသော ထူးဆန်းသည့် အမျိုးသမီးတစ်ဦးက နှောင်း၏ အနာဂတ်တွင် ကြုံတွေ့ရမည့် မိသားစုဝင်တစ်ဦး၏ သေဆုံးမှု၊ သူမ၏ အိမ်ထောင်ရေးနှင့် အသက် ၂၄ နှစ်အရွယ်တွင် ကြုံရမည့် ကံဆိုးမှုများကို ကြိုတင်နိမိတ်ဖတ်ခဲ့ပုံဖြင့် ပဟေဠိဆန်စွာ စတင်ထားသည်။ ဤနိမိတ်ဖတ်ချက်များသည် နှောင်း၏ ဘဝထဲသို့ တစ်ခုပြီးတစ်ခု မှန်ကန်စွာ ရောက်ရှိလာပုံကို စာဖတ်သူတို့ စွဲမက်ဖွယ် တွေ့မြင်ရမည်ဖြစ်သည်။ ဝတ္ထု၏ အဓိက အနှစ်သာရမှာ လူတစ်ဦး၏ ကံကြမ္မာနှင့် ထိုကံကြမ္မာကို ရင်ဆိုင်ကျော်ဖြတ်ရာတွင် လိုအပ်သော စိတ်ဓာတ်ကြံ့ခိုင်မှုနှင့် ဝိပဿနာတရား၏ အရေးပါပုံကို မီးမောင်းထိုးပြထားခြင်းဖြစ်သည်။ ဆရာဝန်တစ်ဦးဖြစ်သူ အောင်စည်နှင့် နှောင်းတို့၏ ပတ်သက်မှု၊ နာကျင်ဖွယ်ရာ ဝေဒနာများနှင့် သေခြင်းတရားကို ရင်ဆိုင်ရချိန်တွင် စိတ်ကို မည်သို့ တည်ငြိမ်အောင် ထိန်းသိမ်းရမည်ဆိုသည်ကို ရေးဖွဲ့ထားသည်။ လောကဓံတရား၏ ရိုက်ခတ်မှုများအကြားတွင် "နံရံ" ဟု တင်စားထားသော အတားအဆီးများ၏ အခြားတစ်ဘက်၌ ရှိနေသည့် အမှန်တရားနှင့် ငြိမ်းချမ်းမှုကို ရှာဖွေပုံကို ဖော်ပြထားသော ဝတ္ထုကောင်းတစ်ပုဒ်ဖြစ်သည်။

"နားမလည်နိုင်တဲ့ စကြဝဠာကြီးထဲမှာ လူသားတစ်ယောက် ဖြစ်တည်နေရတဲ့အဖြစ်ဟာ လူတစ်ယောက် သူ့ဟာသူ ရေချိုးကြွေကန်ထဲ ရေဖြည့်ပြီး ငါးမျှားနေတဲ့အဖြစ်အတိုင်းပါပဲ။ အဲဒီထဲက ဘာမှ ထွက်လာမှာ၊ ရလာမှာ မဟုတ်မှန်းသိသိနဲ့ ရပ်တည်နေရတဲ့ ဘဝကို.."