ကာလီဒါလျှောက်ထုံး

အကျဉ်းချုပ်

အတ္ထုပ္ပတ္တိတို့မည်သည် ရာဇဝင်ဆန်ဆန် ရေးသားရသော စာအုပ်မျိုး ဖြစ်ပေရကား မည်မျှပင် ပြည့်စုံကောင်းမွန် စေကာမူ လူကြိုက်နည်းတတ်သဖြင့် အဆိုပါ “ကာလီဒါသ၏ အတ္ထုပ္ပတ္တိနှင့် သူ၏ ကဗျာ စာပေများ” ခေါ် စာအုပ်ကို ပုံနှိပ် ဖြန့်ချိရန်အတွက် စာအုပ် ထုတ်ဝေသူတို့အဖို့ တွန့်ဆုတ်ကာ မဝံ့မရဲဖြစ်၍ ချင့်ချိန်နှိုင်းဆနေရသည့်အခိုက် ဖတ်သူတို့ကို ဘဝင် ခွေ့စေမည့် ရဟန်းကြိုက်၊ မင်းကြိုက်၊ လူကြီးကြိုက်၊ လူငယ်ကြိုက်၊ ပျိုတိုင်းကြိုက်တဲ့ နှင်းဆီခိုင်ဟု ခေါ်ဆိုလောက်သော စာ တစ်အုပ်ကို ရုတ်တရက် သတိရခဲ့လေသည်။ ထိုစာအုပ်ကား ယခု တင်ပြအပ်သော ဘောဇ ဘုရင် လက်ထက်က ဖြစ်ပျက်ခဲ့ဖူးသည့် ကာလီဒါသ၏ အကြောင်းအရာ ပြဿနာပေါင်းစုံတို့ကို စုခြုံပေါင်းချုပ်၍ ရေးသားထုတ်ဝေလိုက်ရသော “ကာလီဒါသ လျှောက်ထုံး” ပင် ဖြစ်ပေသည်။