ထိပ်သီးစုံ ဇမ္ဗူ ဒိပ် ပုံရိပ်လွှာကောက်ကြောင်း

ဤစာအုပ်နှင့်ပတ်သက်၍ ထွေထွေထူးထူး စကားဦးအမှာ ရေးသား တင်ပြရန် သိပ်မရှိလှပါ။ အမှန်တော့ ဤစာအုပ်သည် လုံးချင်းစာအုပ်ဖြစ်ရန် ရည်ရွယ်ချက် လုံးဝမရှိဘဲ မတော်တဆ အမှတ်မထင် လုံးချင်းစာအုပ် ဖြစ်လာခဲ့ရသည့် Accidental Book သာ ဖြစ်သည်ဟု ဆိုရချေတော့မည်။

စာရေးသူ ရေးသားပြုစုခဲ့သော “ထင်ပေါ်ကျော်ကြားကမ္ဘာ့ခေါင်းဆောင် များ” စာအုပ်ကို ၁၉၉၇ ခုနှစ်တွင်လည်းကောင်း၊ “ခေါင်းဆောင်ကမ္ဘာ ရုပ်ပုံလွှာ” စာအုပ်ကို ၁၉၉၈ ခုနှစ်တွင်လည်းကောင်း၊ “ဇာတ်ခုံကမ္ဘာ ဇာတ်ဆောင်ကမ္ဘာ” စာအုပ်ကို ၂ဝဝဝ ပြည့်နှစ်တွင်လည်းကောင်း ရာပြည့်စာအုပ်တိုက်မှ ပုံနှိပ် ထုတ်ဝေခဲ့ပြီး ဖြစ်ပါသည်။

ထိုစာအုပ်သုံးအုပ်ကို ရေးသားထုတ်ဝေခဲ့ပြီးနောက် အလားတူ စာအုပ်မျိုး ဆက်မရေးတော့ဘူးလားဟု တစ်မျိုး၊ ရေးပါဦးဟု တစ်ဖုံ တချို့သောမိတ်ဆွေ များနှင့် စာဖတ်ပရိသတ်တို့က စာရေးသူအား မေးမြန်းခဲ့ကြသည်။ဟုတ်ပါသည်။ “ဇာတ်ခုံကမ္ဘာ ဇာတ်ဆောင်ကမ္ဘာ” ထွက်ရှိပြီးသည့်နောက် အလားတူစာအုပ်မျိုး ကို စာရေးသူ ဆက်မရေးဖြစ်ခဲ့ပါ။ မရေးဖြစ်ခဲ့ရခြင်းမှာ အကြောင်းကြောင်း သော အကြောင်းများကို အကြောင်းပြုပြီးသကာလ မရေးဖြစ်ခဲ့ရခြင်းဖြစ် သည်ဟုသာ ဆိုရပေတော့မည်။ သို့ဖြင့် မိမိစိတ်ကြိုက်ဆောင်းပါးအချို့ကို ရွေးထုတ်လိုက်ပြီးနောက် ပြင်ဆင်သည်ကိုပြင်ဆင်၊ ဖြည့်စွက်သင့်သည်ကိုဖြည့်စွက်၊ တည်းဖြတ်သင့် သည်ကိုတည်းဖြတ်ကာ ပြန်လည်ရေးသားခဲ့ခြင်းဖြင့် လည်းကောင်း၊ တချို့ အပုဒ်များကို အသစ်စက်စက် ထပ်မံဖြည့်စွက် အားဖြည့်ရေးသားခဲ့ရခြင်းဖြင့် လည်းကောင်း ယခု စာဖတ်သူ၏လက်ဝယ်သို့ ရောက်ရှိနေပြီဖြစ်သည့် “ထိပ်သီးစုံ ဇမ္ဗူဒိပ် ပုံရိပ်လွှာကောက်ကြောင်း” အဖြစ်သို့ အမှတ်မထင် ရောက်ရှိလာခဲ့ရတော့သည်။