မှတ်တမ်းဝင်ပုဂ္ဂိုလ်များ၏ အမှတ်ထင်ထင်ဖြစ်ရပ်များနှင့် မှတ်မှတ်ရရစကားများ

အကျဉ်းချုပ်

ဤစာစုသည် မြန်မာစာပေသမိုင်းတစ်လျှောက်ပေါ်ပေါက်ခဲ့သော မှတ်တမ်းဝင်ပုဂ္ဂိုလ်များ၏ အမှတ်ထင်ထင်ဖြစ်ရပ်များနှင့် ထိုဖြစ်ရပ်များကို အကြောင်းပြု၍ ထိုပုဂ္ဂိုလ်များက မှတ်မှတ်ရရပြောဆိုသော စကားများ အကြောင်း စာစုဖြစ်သည်။ ပဓာနအားဖြင့် ပုဂံခေတ်မှ ကုန်းဘောင်ခေတ် အထိ ပေါ်ပေါက်ခဲ့သော သံဃာတော် မင်း မိဖုရား မှူးမတ် မင်းညီမင်းသား များက အကြောင်းကိစ္စအမျိုးမျိုးကို အကြောင်းပြု၍ ပြောဆိုသောစကားများ အကြောင်းဖြစ်ပါသည်။ ထိုပုဂ္ဂိုလ်များ၊ ဖြစ်ရပ်များနှင့် ပြောသောစကားများကို စာပေဖြင့် အခိုင်အမာ မှတ်တမ်းတင်ထားခဲ့ကြသည့်အတွက် ထိုမှတ်တမ်းများကို အခြေပြု၍ ထိုအကြောင်းများကို ဖော်ထုတ်ထားခြင်းဖြစ်ပါသည်။ မှတ်တမ်း ဆိုရာ၌ ပုဂံခေတ်အလှူမှတ်တမ်းကျောက်စာများကစ၍ ရာဇဝင်၊ အရေးတော်ပုံ၊ လျှောက်ထုံး၊ ဖြတ်ထုံး၊ အတ္ထုပ္ပတ္တိ စသည့် စာပေများဖြစ်ပါ သည်။ ထိုစကားများမှာ ပေါ်ပေါက်လာသော ဖြစ်ရပ်များကို အကြောင်းပြု၍ ပြောဆိုကြသောစကားများဖြစ်သည့်အတွက် ပြောသူ၏စိတ်ထားကို ထင်ဟပ် ပြနေတတ်ပါသည်။ ပြောပုံဆိုပုံများမှာ မှတ်လောက်သားလောက်လည်းရှိပါ သည်။ အစဉ်အဆက်ပြောစမှတ်ပြုလောက်သည့်စကားများ ဖြစ်ပါသည်။