ဋီကာကျော်ရှင်းတမ်း (ပထမတွဲ)

စာသင်သားဘဝကျမ်းစာများကို လေ့လာသင်ကြားစဉ်အခါက မိမိ၏ ဆန္ဒမှာ “သိစရာရှိသမျှ ပြည့်ပြည့်ဝဝ စုံစုံလင်လင် ကုန်စင်အောင် သိလိုခြင်း”ပင် ဖြစ်ပါသည်။ ထိုဆန္ဒမှာ ကျမ်းစာများကို ရေးသားရာ၌ မိမိ၏ ရည်ရွယ်ချက်အဖြစ်သို့ ပြောင်းလဲလာခဲ့ - ပါသည်။ ထို့ကြောင့် ဤဋီကာကျော်ရှင်းတမ်းကို ရေးသားရာ၌လည်း ခေတ်အကြိုက် တစ်နည်းဆိုရသော်- စာသင်သားအကြိုက်သို့ မလိုက်ဘဲ မိမိ၏ ရည်ရွယ်ချက်အတိုင်း သာ ဋီကာကျော်စာကိုယ်ပါဠိကို တစ်ပုဒ်ချင်း တစ်ပိုဒ်ချင်း ပြည့်စုံစွာ ရှင်းလင်းရေးသား ထားပါသည်။

ထိုသို့ရေးသားရာ၌ အမေးသဘောသက်ရောက်သော ခေါင်းစီးများတပ်ပြီး ထိုခေါင်းစီးများနောက်တွင် တိုက်ဆိုင်ကြည့်ရှုရာ၌ လွယ်ကူပါစေခြင်းအကျိုးငှါ ဋီကာ ကျော်စာကိုယ်ပါဠိ စာမျက်နှာများကို လက်သည်းကွင်းဖြင့် ဖော်ပြထားပါသည်။ထို့ကြောင့် ဤ “ကြခတ်ဝိုင်းဋီကာကျော်ရှင်းတမ်း"ကျမ်းစာသည် ဋီကာကျော်ကို ပို့ချနေကြသော စာချဆရာတော်များနှင့် ဋီကာကျော်အကြောင်း ကောင်းကောင်းကြီး သိလိုသောစာသင်သားများ၊ အဘိဓမ္မာကို လေ့လာလိုက်စား သုတေသီများအတွက် အားထားလောက်သော ကျမ်းစာတစ်စောင် ဖြစ်လိမ့်မည်ဟု မျှော်လင့်ယုံကြည်ပါကြောင်း။