ရင်ထဲကအမှတ်တရများ

ဤစာစုကို “ရင်ထဲက အမှတ်တရများ”ဟု နာမည်ပေးထားပါ သည်။ စာစုထဲက ဆောင်းပါးတစ်ပုဒ်၏ နာမည်ဖြစ်သည်။ ဤစာစု စာများသည် ကျွန်တော် ငယ်ရွယ်စဉ်ကစ၍ ယခုအချိန်အထိ ဆုံစည်း ခဲ့ရသော ပုဂ္ဂိုလ်များ၊ ကြုံတွေ့ခဲ့ရသော ဖြစ်ရပ်များထဲက ရင်ထဲမှာ စွဲကျန်ခဲ့သော အမှတ်တရအချို့ကို ပုံဖော်ထားသော စာများဖြစ်သည့် အတွက် ဤသို့ နာမည်ပေးရန် စိတ်ကူးပေါ်ခြင်းဖြစ်ပါသည်။

အမှတ်တရ ကြုံရသော ပုဂ္ဂိုလ်များတွင် စာတွေ့အားဖြင့် သိရှိ မှတ်သားရပြီး လေးစားကြည်ညိုရသော ပုဂ္ဂိုလ်များ ပါဝင်သကဲ့သို့ ကိုယ်တွေ့ ဆုံစည်းရပြီး လေးစားကြည်ညိုရသော ကျေးဇူးရှင် ဆရာ များ၊ ခင်မင်ရသော လုပ်ဖော်ကိုင်ဖက်များ၊ မိတ်ဆွေများ၊ တပည့်များ စသည်တို့ ပါဝင်ပါသည်။ အမှတ်တရ ကြုံရသော ဖြစ်ရပ်များတွင် ငယ်စဉ်ကစ၍ ကျောင်းသားဘဝ၊ ဝန်ထမ်းဘဝ၊ အငြိမ်းစားဘဝတို့ တွင် ပေါ်ပေါက်ဖြစ်ပျက်သော ဖြစ်ရပ်များ ပါဝင်ပါသည်။ စိတ်အာရုံ ထဲတွင် စွဲထင်ကျန်နေသည့် ထိုပုဂ္ဂိုလ်များ ဖြစ်ရပ်များအကြောင်းကို အလျဉ်းသင့်သလို ရေးသားခဲ့ရာ ယခုထိုစာများကို စုစည်းလိုက်ခြင်း ဖြစ်ပါသည်။

ဤစာစုကို စာအုပ်အဖြစ် ပုံဖော်ပေးသော “စိတ်ကူးချိုချိုစာပေ” ကို ကျေးဇူးတင်ပါသည်။

မောင်ခင်မင်(ဓနုဖြူ)