ပြည်သူချစ်သော အနုပညာသည်များ

အကျဉ်းချုပ်

“ပြည်သူချစ်သော အနုပညာသည်များ” ကို စုဆောင်းရှာဖွေနေသည်မှာ လအတန် ကြာပြီးသည့်နောက် မေလ ၂၁ ရက်နေ့တွင် ထုတ်ဝေရောင်းချပါတော့မည် ဟူ၍ ကြော်ငြာထားခဲ့ပါသည်။ ထိုနေ့တွင် ထွက်နိုင်အောင် အမျိုးမျိုးလုံးပန်းနေချိန်၌ ၅ဝ ကျပ် တန်နှင့် ၁ဝဝ ကျပ်တန် စက္ကူများ တရားမဝင်တော့သည့် ကြေညာချက် မေလ ၁၇ ရက်နေ့၌ ထွက်လာခဲ့ပါသည်။ ၅ ကျပ်တန်စာအုပ်ကို ဝယ်ဖတ်နိုင်သည့် လူတန်းစားတွင် ထိုကြေညာချက်သည် အနည်းနှင့်အများ ထိခိုက်မှုရှိတော့မည် ဧကန် ဖြစ်သဖြင့် စာအုပ်တော့ ရောင်းရဖို့ မလွယ်ဟူ၍ အောက်မေ့မိသည်။ သို့သော် စာအုပ်ကလေးမှာ ဘယ့်နှယ်ကဘယ့်နှယ် ရောင်း၍ ကောင်းလေသည်မသိ၊ ရက်ပေါင်း ၄ဝ အတွင်း၌ ပထမနှိပ်ခြင်း အုပ်ရေ ၃၅ဝဝ ကုန်၍ သွားပါသည်။ စာဖတ်ပရိသတ်သည် ဤစာအုပ်ကို ထွက်လျှင်ထွက်ချင်း ဝယ်သည်၊ ဝယ်ပြီး လျှင်ပြီးချင်း ဖတ်သည်၊ ဖတ်ပြီးသည်ဆိုလျှင်ပင် ကျွန်မထံသို့ စာတစ်စောင် ရေးဦးမှ ဆို၍ ရေးကြဟန်ရှိပါသည်။ စာအုပ်ထွက်ပြီး တစ်ပတ်လောက်ကစ၍ ယနေ့ထက်တိုင် ဝေဖန်အကြံပေးချက်အမျိုးမျိုး ရောက်ရှိနေဆဲရှိပါသည်။