ကိုလိုနီခေတ် မြို့အုပ်ကြီးတစ်ဦး မှတ်တမ်း အနောက်တံခါးမှူး မောင်မှူး (ဒုတိယတွဲ)

ကိုလိုနီအုပ်ချုပ်ရေးကို သာမန်မြင်နိုင်ရုံမျှ မှုန်ဝါးဝါးသာ ဖော်ပြပေးခဲ့ကြသည်။ မြို့အုပ်ကြီးကမူ အုပ်ချုပ်ရေးကို တာဝန်အဖြစ်သဘောထားကာ ပေါ်အောင် ရေးသားခဲ့သည်။ နိုင်ငံရေး၊ လူမှုရေး အဖြစ်အပျက်များကိုလည်း ကြုံခဲ့ရဖူးသလို တွဲဖက် စပ်ဟပ် ရေးသား တင်ပြခဲ့သည်။

မြို့အုပ်ကြီးသည် ကိုလိုနီခေတ်၊ ဂျပန်ခေတ်နှင့် လွတ်လပ်ရေးရစခေတ်များကို ဖြတ်သန်းခဲ့ရသည်အတိုင်း ပီပြင်စွာ ဖော်ပြနိုင်ခဲ့သဖြင့် မိမိတို့ ဘိုးဘွားတို့ အတွေ့အကြုံ ပြောစကားများဖြင့် တိုက်ဆိုင်စစ်ဆေးကြည့်လျှင် အားထားနိုင်စရာ အထောက်အထားများ ဖြစ်သည်ကို တွေ့ရှိ မှတ်သားရသည်။ ထို့ကြောင့် ပြန်လည်ဖောက်သည်ချပေးသူ အနောက် တံခါးမှူး မောင်မှူးကို အထူးကျေးဇူးတင်မိရသည်။

စာရေးသူ အနောက်တံခါးမှူး မောင်မှူးသည်လည်း ယင်းကိုယ်တိုင်က အစိုးရ အရာရှိကြီးတစ်ဦးဖြစ်ခဲ့သောကြောင့် ဖခင်ခြေရာနင်းကာ အမှုထမ်းကာလ ကြုံကြိုက်ခဲ့ရသည် များ၊ ကြားမြင်တွေ့သိခဲ့ရသည်များကို နောင်လာနောက်သား မျိုးဆက်သစ်များသို့ အမွေအဖြစ် ရေးသားထားရှိပေးခဲ့ပါရန် လေးစားစွာ တိုက်တွန်းလိုပါသည်။

လူသား၏ အတွေ့အကြုံနှင့် ဉာဏ်ပညာသည် လူမှုသမိုင်းကို ပိုမိုတိုးတက် ပြောင်းလဲ လာနိုင်စွမ်းရှိပါသည်။ ထို့ကြောင့် များများသိ များများကြုံကြိုက်ခဲ့ရသော အနောက်တံခါးမှူး မောင်မှူးကလည်း မိမိနှင့် ပတ်ဝန်းကျင် လူမှုသမိုင်းဖြစ်စဉ်များကို မျိုးဆက်သစ်တို့ အမွေ ဖြစ်စေဖို့ ရေးသားဖော်ပြပေးပါရန် တိုက်တွန်းနှိုးဆော်အပ်ပါသည်။

တိုးလှ