အမေးတော်ဖြေ

အကျဉ်းချုပ်

အမေးတော်ဖြေ ကျမ်းကြီးကား--- - ပုဂံခေတ်၏ သဒ္ဒနီတိကျမ်းကဲ့သို့၎င်း, ပင်းယခေတ်၏ အဘိဓာန်ဋီကာကျမ်းကဲ့သို့၎င်း, အင်းဝခေတ်၏ ယသဝဍ္ဎနဝတ္ထု, မဏိကုဏ္ဍလဝတ္ထုတို့ကဲ့သို့၎င်း, ကုန်းဘောင်ခေတ်၏ မော်ကွန်းတန်ဆောင် ထွန်းပြောင်သော မီးရှူးတိုင်ကြီး ဖြစ်သည်ဟု ဆိုရသော် သင့်အံ့ထင်သည်။ သာသနိကကျမ်းများတွင် မိလိန္ဒပ္ပဉာ့ ပါဠိတော်ဟု ထင်ရှားသော “အမေးတော်ဖြေ’ ကျမ်းတစ်ခုရှိသည်၊ ယင်းကျမ်းသည် မိလိန္ဒ (မာလိန္ဒ) မင်းကြီး၏ အမေးတော်များနှင့် ရှင်နာဂသိန်၏ အဖြေများကို စုပေါင်းထားရာကျမ်းဖြစ်သည်။ ဤအမေးတော်ဖြေ ကျမ်းကြီးသည်လည်း အမရပုရ ပဌမမြို့တည်, နန်တည် ဘိုးတော်မင်းတရားကြီး၏ အမေးတော်များနှင့် မောင်းထောင်သာသနာပိုင် ဆရာတော် ဘုရားကြီး၏ အဖြေများကို စုပေါင်းထားရာကျမ်းကြီးဖြစ်သည်။ မြန်မာဘာသာ မိလိန္ဒပ္ပဉာ့ ခေါ်သင့်သော အမေးတော်ဖြေကျမ်းကြီးကို ဖြေဆို တော်မူနိုင်စွမ်းသော သာသနာပြု မောင်းထောင်ဆရာတော်ဘုရားကြီးကား သာသနိက ရဟန်းတော် ၁-ပါးပင် ဖြစ်သော်လည်း သာသနာတော်မှအပ ‘ဗာဟီ’ ဖြစ်သော လောကိယ ကျမ်းအမျိုးမျိုးကို နားလည်တတ်မြောက်တော်မူသည်။