ခရုခွံအရုပ်ကလေးများ ဘာသာစကားနှင့် စာပေ ပေါင်းကူး ဆက်သွယ်မှု

အကျဉ်းချုပ်

ဦးဝင်းချိုက “ဥဒါန်းသစ်စာပေမဂ္ဂဇင်း” အတွက် စာမူတောင်းလာ သောအခါ ဘာသာနှင့် စာပေ အပြန်အလှန် ပေါင်းကူးဆက်သွယ်မှု အကြောင်း ရေးရန် စိတ်ကူးပေါ်လာသည်။ ဆရာကြီး မင်းသုဝဏ်၏ “ကဗျာဟူသည် အဘယ်နည်း” ဆိုသော ဖွင့်ဆိုပုံ ကလေးကိုလည်း သတိရလာသည်။ ဆရာကြီးက ငပလီ လူရည်ချွန်စခန်းတွင် လူငယ် ကလေးများက ခရုခွံကလေးများကို ကျွမ်းကျင်သောလက်ဖြင့်အမျိုးမျိုး တွဲစပ်၍ လှပသော အရုပ်ကလေးများ ပြုလုပ်ကြပုံကို ဥပမာဆောင်ပြီး ကဗျာ ဆိုသည်မှာ အနုပညာလက်ဖြင့် ဖန်တီးသော စကားလုံး အရုပ် ကလေးများ ဖြစ်သည်ဟု ဖွင့်ဆိုခဲ့သည်။ ဆရာကြီး၏ အဆိုအမိန့်ကို အာရုံ ပြုလိုက်သောအခါ ဘာသာစကားဆိုသော ခရုခွံကလေးများဖြင့် စာပေ ဆိုသော အရုပ်ကလေးများ ဖန်တီးခြင်းဖြစ်သည်ဟု နားလည်မိ သည်။ သို့ဖြင့် “ခရုခွံအရုပ်ကလေးများ” ဟူသော ခေါင်းစဉ်ဖြင့် ဤစာစု ကို ရေးလိုက်ပါသည်။ ဤစာစုကို စာအုပ်အဖြစ် စုစည်းထုတ်ဝေသော ဦးဝင်းချိုနှင့် ဥဒါန်းသစ်အဖွဲ့သားများကို ကျေးဇူးတင်ပါသည်။ မောင်ခင်မင်(ဓနုဖြူ)