သာသနာ လင်္ကာရစာတမ်း

သမ္မာသမ္ဗုဒ္ဓ ဒွိပဒုတ္တမ လောကသင်းကျစ် ဓမ္မရာဇ်မှန်ကူ သယမ္ဘူထွတ်ထား သဗ္ဗညု မြတ်စွာဘုရား၏ အံ့ဖွယ်ရှစ်ဖြာ သာသနာတော်၏ တည်ထွန်း သက်ဆင်းပုံ အကြောင်းစုံကို ဗုဒ္ဓဘာသာဝင်တိုင်း သိသင့်သိထိုက်သော အကြောင်းအရာတစ်ခု ဖြစ်သည် အားလျော်စွာ မဇ္ဈိမဒေသခေါ် အိန္ဒိယပြည်၊ သီဟဠဒီပခေါ် သီဟိုဠ်ကျွန်းတို့၌ သာသနာ တည်ထွန်း သက်ဆင်းပုံကို အဋ္ဌကထာ၊ ဋီကာ၊ မဟာဝင်၊ ဒီပဝင် စသည်တို့၌ လာရှိပြီးဖြစ်၍ ကြည့်ရှု လိုသူတို့ ရှာဖွေရန် လွယ်ကူပေသည်။ မြန်မာပြည်အတွက်မှာမူ ရာဇဝင်၊ သမိုင်း၊ မော်ကွန်း၊ သံပိုင်း၊ ဧချင်း၊ ကျောက်စာ စသည်တို့၌သာ တစ်ပိုင်းတစ်စ အစီအစဉ်မရှိ အရောရော အထွေးထွေး လာရှိရကား ကြည့်ရှုလိုသူတို့ ရှာဖွေရန် မလွယ်ကူလှချေ။ ထို့ကြောင့် မြန်မာ ပြည်၌ သာသနာ သက်ဆင်းပုံ၊ တည်ထွန်းပုံနှင့်တကွ ဆရာအစဉ်အဆက်ကို ရွဲလုံးများကို သီကုံးထားသကဲ့သို့ စီကာစဉ်ကာ သိရှိတော်မူလိုသော ရတနာပုရ စတုတ္ထ မြို့တည်နန်းတည် ဘဝရှင် မင်းတရားကြီးသည် အတွင်းဝန် ဆောမြို့စား မင်းကြီး သိရီမဟာနန္ဒသင်္ကြံ မှတစ်ဆင့် တိုက်တွန်းအပ်သည်ဖြစ်၍ မင်းတိုင်ပင် အမတ်ကြီး မဟာဓမ္မသင်္ကြံသည် အထူးထူးသော ပိဋကကျမ်းတို့နှင့် ညှိနှိုင်း တိုက်ဆိုင်လျက် အစောင်စောင်သော ရာဇဝင်၊ သမိုင်း၊ မော်ကွန