ဩဝါဒဓမ္မကထာ (ဒုတိယတွဲ)

အကျဉ်းချုပ်

ဆရာတော်ဘုရားသည် ညွှန်ကြားမှုကို တိတိကျကျပေးသည်၊ ဖြစ်စေ ချင်သည့် ဆန္ဒကို ရှင်းရှင်းလင်းလင်းလည်း ပြောပြသည်၊ စာသင်သားရဟန်း, သာမဏေတို့ကိုသာ သွန်သင်ဆုံးမသည်မဟုတ် အုပ်ချုပ်သူဘုန်းကြီးများ၏ လိုကွက်, ဟာကွက်, ပျော့ကွက်များကိုလည်း အားမနာတမ်း ပြောပြထောက်ပြ သည်၊ ပြုပြင်ပေးသည်၊ ဆရာတော်ဘုရား၏ သီလ,သမာဓိ,ပညာ,သဒ္ဓါ, ဝီရိယ အားတို့ကို နောက်ပုဂ္ဂိုလ်များက လိုက်မမီနိုင်၍ အရာရာမှာ အားမလိုအားမရ ဖြစ်ရပါသည်၊ ထိုပြုပြင်ညွှန်ကြားချက်များကိုလည်း ဤဩဝါဒဓမ္မကထာ (ဒုတိယတွဲ)၌ ဖတ်ရှုရမည်ဖြစ်ပါသည်။ ဆရာတော်ဘုရား၏ အချို့ဩဝါဒများ ထပ်ပါနေသည်ကို တွေ့ရပါမည်၊ နေရာဌာနနှင့် အခြေအနေမတူညီ၍ မပယ်နုတ်ဘဲ ထပ်ထည့်ထားပါသည်၊ ထို့အပြင် ထပ်ပြီးနားလည်စေချင်၍ ထပ်ထည့်ပါသည်၊ ဆရာတော်ဘုရားက “တချို့ဟာတွေ မနှစ်ကလည်း ပြောခဲ့တယ်၊ ဒါပေမယ့် အရေးကြီးလို့ ခုထပ်ပြီး ပြောပါတယ်၊ အလှူလုပ်တာကအစ အလွဲလွဲအချော်ချော်ဖြစ်နေလို့ ထပ်ပြော ရတယ်”ဟု မိန့်ဆိုထားသည်ကို ဖတ်ရှုရမည်ဖြစ်ပါသည်။