ကဗျာဖန်တီးသူနှင့် ကဗျာခံစားသူ

ကဗျာရေးသူဘက်မှ ဘဝအတွေ့အကြုံ၊ ခံစားမှု၊ စိတ်ကူးနှင့် ဖန်တီးရေးဖွဲ့မှု အနုပညာ လိုအပ်သကဲ့သို့ ကဗျာခံစားသူများအပိုင်းမှလည်း ကဗျာဖြစ်ပေါ်လာရသည့်အကြောင်း၊ ကဗျာစာဆို၏ ခံစားမှု၊ စိတ်ကူး၊ စကားသုံး၊ အလင်္ကာနှင့် နိမိတ်ပုံအသုံး၊ အသံကာရန်၊ နရီစည်းဝါးတို့ကို ကောင်းစွာအသုံးချ၍ အနုပညာဂုဏ်မြောက်အောင် ရေးဖွဲ့ပုံတို့ကို ခံစားတတ်အောင် အားထုတ်သင့်ပါသည်။ ကဗျာကို ခံစားဖတ်ရှုမှု၌ အားထုတ်မှုများလာမှသာ ကဗျာမှရသော ရသကို ခံစားနိုင်ပြီးလျှင် ဘဝ အမောပြေနိုင်ကြမည် ဖြစ်ပါသည်။ တစ်သက်တာဘဝအတွက် ရသ နှစ်သက်ခြင်းမှ တစ်ဆင့် ကဗျာကပေးသော ကဗျာဆရာ၏ စေတနာဟု ဆိုရမည့် ဘဝအသိကိုလည်း စွဲမြဲမှတ်သားနိုင်မည် ဖြစ်သည်ဟု ယုံကြည်မိပါသည်။

ကျွန်မသည် မမိုးမြေ ကလောင်အမည်နှင့် ရသစာပေဖြစ်သော ဝတ္ထုတို၊ ဝတ္ထုရှည် အများအပြားကို ရေးခဲ့သော်လည်း စာပေသဘော တရား စာအုပ်များကို မရေးခဲ့ဖူးပါ။ ပါရဂူဘွဲ့ ရရှိပြီးမှ စာပေသဘောတရား စာအုပ်များကို ရေးဖြစ်လာသည့်အတွက် ပါရဂူတန်းတက်ရန် အားပေးခဲ့သော ဆရာကြီး ဒေါက်တာခင်အေး (မောင်ခင်မင် – ဓနုဖြူ) အား အထူးပင် ကျေးဇူးတင်ရှိပါကြောင်း မှတ်တမ်းတင်အပ်ပါသည်။