အကယ်ဒမီ

အကျဉ်းချုပ်

စကြဝဠာ အနန္တအတွင်း၌ မြူမှုန်မျှသာဖြစ်သော ဤကမ္ဘာပေါ်မှ လူတစ်ယောက်အကြောင်းသည် နှစ်ပေါင်း ၁ဝဝ အတွင်း ပျောက်ပြယ်သွားရမည်မှာ သေချာပါသည်။ ထိုအခါ ရုပ်ရှင်မင်းသမီး တစ်ယောက်မျှသာဖြစ်သော ဒေါ်ရွှေစင်၏အကြောင်းသည် တော်တော်သေးသိမ်သည့် အလျောက် ကျွန်တော် ပြောပြနေရသည်ကိုပင် ရှက်ရွံ့မိပါတော့သည်။ မည်သို့ပင်ရှိစေ၊ နှစ်ပေါင်း ၁ဝဝ အတွင်း၌ အသက်ရှင်လျက်ရှိသော ကျွန်တော်သည် ဒေါ်ရွှေစင်၏အကြောင်းကို ပြောပြချင်နေမိပါသည်။ လူသားတို့သည် အလွန် လေးနက်သောအချိန်၌ လောကကြီးကို အသေးဆုံးမြင်ပြီး အလွန်ပေါ့တန်သောအချိန်၌ လောကကြီးကို အကြီးမားဆုံး မြင်တွေ့တတ်ကြသည် မဟုတ်ပါလား။