တစ်ကွေ့ကွေ့တော့ တွေ့ကြဦးမည်

နယ်ချဲ့ဆန့်ကျင်ရေးတိုက်ပွဲများ၊ ဖက်ဆစ်တော်လှန်ရေး၊ လွတ်လပ်ရေး တိုက်ပွဲ၊ ဒီမိုကရေစီတိုက်ပွဲများကြားတွင် ဖြတ်သန်းလာခဲ့ရသော၊ ထို ကာလတစ်လျှောက် အရွယ်ရောက်ကဏ္ဍနှင့် နိုင်ငံရေးနှင့် လူထုလူတန်း စား လှုပ်ရှားမှုများတွင် ကိုယ်တိုင်ပါဝင်လှုပ်ရှားခဲ့သော စာရေးဆရာ တစ်ယောက်၏ ဝတ္ထုပီသစွာပင် ထိုကာလတစ်လျှောက် တိုက်ပွဲများကို ကျောရိုးပြုထား၏။ နယ်ချဲ့ဆန့်ကျင်ရေး၊ အမျိုးသားလွတ်မြောက်ရေး ကာလတိုက်ပွဲများတွင် အမျိုးသားသစ္စာဖောက်တို့နှင့် တိုးတက်သော ပြည်သူတို့၏ တိုက်ပွဲကို ပြ၏။ အမျိုးသားသစ္စာဖောက် ဆိုသည်မှာ အဘယ်နည်း။ အမျိုးသားသစ္စာဖောက်သည် မည်သည့်အခြေခံတွင် ရပ်တည်ဖြစ်ပေါ်လာရသနည်းဟူသော အချက်ကို အဓိကဦးတည်ချက်ပြု ထား၏။ ထိုအခါ လူတန်းစားပြဿနာသည် ပဓာနပြုလာ၏။ နတ်နွယ် သည် ဝတ္ထုတစ်လျှောက်လုံးတွင် ထိုဦးတည်ချက်ကိုပင် မဏ္ဍိုင်ပြုပြီး ရေးဖွဲ့ထားလေသည်။ ဝတ္ထုအမည်သည်ပင် ဝတ္ထု၏ဦးတည်ချက်ကို ဖော်ပြနေဘိသည်သို့ရှိ၏။ မှန်သည်။ လူတန်းစားပြဿနာ ရှိနေသမျှ လူတန်းစားတိုက်ပွဲသည် ရှိနေရမည်။ လူတန်းစားတိုက်ပွဲ၌ အပေါ်စီးရရန် ကြိုးပမ်းသူ နယ်ချဲ့လက်ဝေခံ အလိုတော်ရိတို့သည် အမျိုးသားသစ္စာ ဖောက်လမ်းကြောင်းသို့ လိုက်ကြ၏။