ပီကာဆို၏ပဉ္စလက်မီးအိမ် ၊လက်ရွေးစဉ် စာတမ်းများ၊

ဤစာအုပ်အတွက် စာတမ်းများ ရွေးချယ်ရာတွင် အများစုမှာ မဂ္ဂဇင်းများတွင်သာ တစ်ကြိမ် သို့မဟုတ် ထို့ထက်ပိုလျှင် နောက်ထပ် တစ်ကြိမ် စသည်ဖြင့်သာ ပုံနှိပ်ဖော်ပြရသေးသည့် စာများဖြစ်ပါသည်။ ဆိုလိုသည်မှာ ဆရာမြသန်းတင့်၏ လုံးချင်းစာအုပ်အနေနှင့် ပုံနှိပ်ထုတ်ဝေ ခြင်း မပြုရသေးသော စာများ ဖြစ်ပါသည်။

ယခုစာအုပ်ငယ်သည် ဆရာမြသန်းတင့်၏ စာပေလက်ရာတစ်ရပ် လုံးကို မခြုံငုံနိုင်သည့်တိုင် တစ်စိတ်တစ်ပိုင်းကိုကား မီးမောင်းထိုးပြနိုင် သည့် အမြန်ညွှန်း သို့တည်းမဟုတ် အတိုညွှန်းစာအုပ်အဖြစ် ယူဆနိုင်မည် ထင်ပါသည်။ စုစည်းရွေးချယ်ဖော်ပြထားသည့် စာတမ်းများထဲတွင် အမှာစာ နှစ်ပုဒ်ပါဝင်ရာ တစ်ပုဒ်က ဝတ္ထုတိုအကြောင်း၊ ကျန်တစ်ပုဒ်က ကဗျာ အကြောင်း ဖြစ်ပါသည်။ ဆရာမြသန်းတင့်၏ ဝတ္ထုတိုအမြင်နှင့် ကဗျာအမြင် တို့ကို အကဲဖြတ်နိုင်ကြမည်။ ပြီးလျှင် “ဇော်ဂျီ၊ ကျွန်တော်နှင့် သီရိပစ္စယာ အလွမ်း”ခေါင်းစဉ်ဖြင့် စာတမ်းနှစ်ပုဒ်ပါသည်တွင်လည်း ၁၉၉ဝ ခုနှစ်ရေး ပထမအပုဒ်က ဆရာဇော်ဂျီရုပ်ပုံလွှာအဖွဲ့အနွဲ့ဖြစ်၍ ၁၉၉၅ ခုနှစ်ရေး ဒုတိယအပုဒ်မှာ ပုဂံအကြောင်း ရေးသားချက်ဖြစ်ပါသည်။